終於等到重影法國婚紗的大日子

太耐無UPDATE個BLOG，我自己都覺得太懶。其實離婚期還有八個月，但籌備結婚的事一樣樣去做，只是工作太忙，沒有時間去UPDATE這個BLOG。

現在不如分享一下最近重影法國婚紗的詳情啦!

我其實同法國婚紗都幾有緣份，這一年內也與這公司有著關係。

(1)上年十一月EXPO JOIN 法國婚紗影PREWEDDING

(2) 今年三月中影相。由於天氣關係，外景部份要POSTPONE

(3) 四月尾補影馬灣外景

(4) 五月頭揀相。相片質素不太滿意，要求重影。

(5) 七月重影和揀相。

(6) 四個月後的十一月才有相簿和油畫製成品

真的想不到影一輯PREWEDDING都要一年時間才有製成品，所以若果決定結婚不得不早一點JOIN PACKAGE。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

重影法國婚紗

七月頭有一天去了重影法國婚紗PREWEDDING。一大袋出發!有自己買的花做頭花、公仔、鞋、GIRDLE和自己做的功課。

天氣好得不能形容，有一種好幸福的感覺，我覺得上天終於憐憫我，所以給予我極好的天氣。準備十點到達。由於已經去過這裡幾次，所以已經好熟環境喇!還有一份強烈的親切感。

等到差不多十點九先開始化妝，因為我覺得化妝師琳琳上次化妝手勢熟練，我想SET的頭都一一SET到，所以今次重影都要求不要轉化妝師。

我對琳琳完全好有信心。我比返上次攞返的相版佢睇，所以佢都記得我上次的妝和頭係點樣。今次我搵左另外一D 髮型SAMPLE比佢整。

因為天氣太熱，外面藍天無雲，所以先影室內。我先換了紅色晚裝。上次是短髮LOOK，將頭髮盤哂上去。今次，我反而想側邊有一些卷卷效果加頭飾，側邊有些少頭髮放下來。最後都成功整到心水的晚裝頭。

我好鍾意今次的頭飾、頸鍊、手鍊和耳環。原來最近有些新返飾物，這些飾物真的更靚更新潮。我好鍾意呀!

差不多十二點多就見到今次的攝影師和助手。之前，我沒有要求FB安排邊個攝影師比我，因為我覺得影相呢樣野好主觀。有人講得邊個邊個影得靚，但又人會講得邊個邊個影得唔靚，所以我事前都沒有特別指定，只是要求唔好比邊個邊個影咋!

原來邊個邊個已經無係FB做喇!我今次的攝影師叫阿JUN，助手叫SUNNY。今次整個拍照過程都好開心，因為阿JUN同SUNNY都好PRO，真係值得向大家推介呀!

我地先同攝影師同助手傾下點解上次唔滿意，同埋大概講下今次想點影。佢地兩個都好NICE，好似好知道我地想點。同埋，我當然比我之前做O既功課比佢睇啦!入面有不同景點的相，呢D相係我鍾意O既FEEL同埋角度。

好...我地開始先係STUDIO影晚裝。先是白色玫瑰花景、旁邊的梳化景、白色佈景、有花有藤的景和公仔房。之後就轉到BAR台、餐台和窗邊。哈哈...係咪唔明我講乜野呢?!大家聯想一下啦!

唔知點解，開始影的時候，我地兩個都好似入唔到戲。阿JUN成日叫我地笑得開心D，我地都好似笑得唔係咁自然。可能真係因為影左幾次的關係啦!

佢地兩個都好好，張張相都提大王伸個頭出黎，咁條頸就唔會咁肥。又提大王唔好戚眼戚嘴。又教我地點企會覺得瘦D，張張相都同將大王件衫整返整齊，幫我件婚紗的拖尾放返靚。佢地睇我地正面，有乜問題佢地都會睇得好清楚。佢地兩個咁有耐性同細心的表現，真的令我放心好多。

不久之後，就換返套九龍塘婚紗影室外園景。今次我想叫琳琳幫我整個新LOOK，就是將所有頭髮盤上去再加頭紗。整完之後照鏡睇都鍾意，因為好似比較簡單清雅一點。我們先影水池景。天氣太熱太曬喇!我們的戶外拍照時間開始喇!熱得大王好辛苦。

阿JUN都好識做，影我單人照的時候叫大王去樹蔭避一避。但大王的額頭都係大汗叠細汗，我見到佢都笑唔出喇!

之後就除鞋玩浸腳和踢水。其實可能上次影水池景的效果都不太好，所以今次都無乜期望，所以今次呢個景我都無乜MOOD影。水池景之後就快快返去影有花花BELL的正門。原來，下一站馬灣外景係要四點前入到去，唔係就要搭SHUTTLE BUS或船入去，因為馬灣的交通規定外來有授權的車輛要四點前進入。影埋正門都已經三點多，所以攝影師叫琳琳快D同我換衫和轉頭。

大家都好似好緊張咁，因為趕唔切就唔知點算喇!所以琳琳本身幫第二個化緊妝都要過返黎幫我整先，仲叫埋其他姐姐幫手SET頭和襯飾物。我今次買了一些多頭小紅玫瑰做頭花，所以佢地幫我整頭，又要幫我夾頭花上去。時間有限，所以都要好快手。今次的外景頭，我諗住同上次補影一樣，就係我個BLOG BANNER張相個頭喇!雖然影外景會熱，但馬灣外景係我的重頭戲，一定唔可以衰，所以放哂頭髮落黎就最穩陣。

這些多頭小玫係影相早兩日去花墟買，只是$15就有咁多。我係屋企放左兩日先拎去影相，可能有陽光的關係，小玫瑰開得好靚呀!

上次放落黎的髦髮有真髮和假髮，今次因為天氣熱，琳琳驚我一出去出汗就變返直，所以將我D真髮盤哂上去，再夾一些髦的假髮，所以都SET得快D。攝影師同司機都走左上黎催左兩次，但其實琳琳都已經好快手，若果唔係佢實慢慢好有心機咁幫我整。可能因為時間太趕的關係，我覺得上次馬灣個頭靚D。

後來，我地三點四十分先上車。等緊助手之際，我問佢地個花球係邊，因為好似唔見係車度。原來真係無拎呀!好彩最後拎返個花球咋!唔係...去到馬灣就無花球影相喇!

我地剛剛四點到達馬灣，好彩咋!真係抹一額汗呀!

好開心再次來到我好鍾意的馬灣公園，因為我鍾意呢度有顏色鮮豔的馬灣公園和沙灘。上次四月尾影都有得影漁村O家...宜家無左喇!有D失望啦!唯有安慰自己，好彩上次拎走左五張相版入面有兩相係漁村咋!

阿JUN係公園入口的草地都已經幫我地單人和雙人影左好多張。一邊影，我的血已經成為好多蚊的食物喇!一邊影一邊痕....

係草地影左好多POSE，有單人有雙人、有單人訓地，又有雙人訓地。一個地方都影好多張，上次每個景只係影三張左右咋!

係馬灣外景這個環節，我真係好滿意阿JUN同SUNNY的表現。上次影相，每次都係我整返自己件婚紗拖尾和大王的背心有沒有移位。相反今次，我未TAKE ACTION，佢地已經幫我睇左。基本上，每影一張相就好細心咁掃一次。仲好有心機咁幫我鋪裙，我宜家先知原來條裙鋪得靚，影出黎的相會有美感好多。

佢地知我地出哂汗，大王甩哂粉，影相出黎會多油光，所以叫MONA LISA的化妝姐姐出黎幫我地補粉和搽唇彩。當然啦!若果影出黎係油光滿面咁點會揀呢D相呢!我真係幾欣賞佢地事事盡善盡美和認真的工作態度。

可能同上次FB影相和台灣PREWEDDING有對比之下，今次攝影師和助手真係相對地比較OUTSTANDING和專業。

今次仲可以影埋馬灣公園的大貝殼，因為今次無噴水，而且阿JUN有求必應，所以幫我們影了兩張。

另外還影了七彩牆和花，令到影出來的相充滿色彩。當然少不了下次這個景啦!

還有這條好多花花的路，影左好多張相。

這個鐘的位置都影左幾張。

之後就去到沙灘玩沙。今次大王好似當自己去左台灣咁，換左件粉紅色的襯衫和牛仔褲，好自然的FEEL。今次個沙灘係無乜人，所以阿JUN鍾意點影就點影。佢地將地帶黎O既四隻公仔企係我婚紗度，佢地係大細獅子和兩隻好可愛的兔仔。

當然仲有一D係青馬大橋下玩水的相，今次玩水的表情和舉動就自然得多。總括黎講，係沙灘雖然熱，但我同大王都笑得自然和開心一點。

上次係沙灘影左好少相，同埋因為左右都各有一PAIR人，所以攝影師可以係一個好狹窄的角度影相。玩水和扮漫步沙灘又毫無美感，所以好多相都唔滿意。

其實我真係好感恩，因為第二次黎馬灣影婚紗相都係一樣藍天白雲，好開心呀!

大約六點，我地就回程返去九龍塘。呢個PREWEDDING拍攝之旅仲未完，因為之前趕住黎馬灣，所以之前個套九龍塘婚紗仲未影完O家!所以返去就換返套婚紗和再SET過個頭。

因為剛才係馬灣問阿JUN拎部相機睇返PLAYBACK，我掃左幾張相覺得好AMAZING，點解大王今次隻眼同條頸可以咁正常?!因為上次有好多大細眼和肥頸的問題，今次反而無乜呢個問題。心諗，死啦!D相咁正常，實會買好多O家喎!

另外，睇返D PLAYBACK覺得今次影出來的晚裝相好OK，上次晚裝相好失望，好多都唔鍾意，今次就正常好多。原來唔係我個LOOK和套衫的問題，原來係影出黎個FEEL、角度和捕捉時間的問題。

但有少少唔開心係原來我下午係九龍塘影的婚紗LOOK唔OK。今次係個LOOK唔OK，原來我係唔可以咁簡單將D頭髮盤哂上去。好彩傍晚返九龍塘換返衫再影，唔係我起碼有三份一的相都唔駛要喇!

原來一個適合自己的LOOK都好緊要。我同琳琳講話之前個簡單清雅LOOK唔O岩我。我想卷辮仔和下面是直髮。因為佢有時間，所以可以慢慢勁有心機幫我整頭。最後，真係好滿意呢!

因為我係影相之前講過話今次想影多D婚紗相，所以夜晚返到黎都影好多婚紗相。鋼琴景、BAR台景、紅色梳化景和木門景等等。大王同我都已經好累，我仲打喊路，但佢地兩個都仲好有精力，真係十級佩服。原來夜晚咁黑都可以影到好似日頭咁。不過原來夜晚影木門景無陽光都幾有FEEL。

因為我之前講帳幕景影婚紗，唔影晚裝。佢地好好記性，最後叫我地去影埋帳幕景(我地仲諗住收工呢!)。

大約八點幾先正式收工。

我都知道自己要求較多，多謝阿JUN和SUNNY有求必應的工作態度。

辛苦大王、攝影師和助手哥哥!

呢個時候，著返自己O既衫，發覺自己個肚LIP哂...表面睇瘦左成個碼。宜家先醒覺原來我同大王係早餐之後就無再食過野.....好肚餓呀!餓都行唔郁....

最後搭的士去九龍城食泰國大餐，飲了一整個冰涷椰清，好清涼呀!

係結婚之前，可能都無得再影PREWEDDING，好想再著住婚紗影相呢!

期待揀相日的來臨~~~

 

PS: 有部份晚裝造型照在下篇BLOG，只限BLOG友。