法國婚紗揀相分享篇

我昨天才從台北影完PREWEDDING返黎，整個旅程與大王都好開心呀!

但原來，在台灣拍婚照真的很辛苦呀!遲D先同大家分享。

大量的BLOG債未還，好多東西都未寫出來分享，就等我率先分享在出發到台北影相的前幾天(5月2日)的法國婚紗揀相事情。

好...等我再回憶一下先....其實FB這輯PREWEDDING係因為天雨關係分左兩次影...

(1) 3月12日--->著拖尾婚紗影了九龍塘室內外景和紅色晚裝影室內STUDIO景

(2) 4月30日--->著輕身一點的外影婚紗影馬灣外景

(3) 5月2日--->快快去揀相，因為過幾日就去台灣影婚照

 

5月2日10:45到達FB揀相，之後有1:45PM和6:45SESSION，當然揀最早個個SESSION啦!

OH MY GOD!可能我地係第一PAIR去到，被安排坐在RECEPTION隔離，咁就安心睇相揀相啦!

咁我同大王就自已由第一張睇到最後一張，好似影左百幾張相。基本上第一次快掃都知大概影成點，同埋知道有邊D一定會捨棄。

之後第二次掃，就開始「捨棄」喇!

其實最主要的「捨棄」原因是...

(1) 我的手臂過份粗壯

(2) 我和大王的姿勢毫無美感，硬哂呔

(3) 影到大王的戚眼、戚嘴和兩條頸

(4) 照片毫無感覺

(5) 同一姿勢和角度捨棄無咁鍾意個張

(6) 構圖失敗

其實睇完一次，我地都覺得有D失望。

(1) 九龍塘室內外景婚紗: 其實STANDARD 景和姿勢應該唔難拍啦!但....竟然無一張池園景揀得落手。其他的景就每個景都揀一至兩張。

(2) 九龍塘室內STUDIO晚裝: 這一PART好失望。可能我睇得BLOG友分享的相太多，所以看到自己的相咁無FEEL，覺得好失望。有些景更加一張都無揀到...因為真係揀唔落手呀!反而，我最無期望的公仔房，竟然揀左幾張，因為我帶左自己的公仔去，所以覺得有返少少代表性。

(3) 馬灣外景婚紗: 這一PART原來仲失望過晚裝那PART，因為馬灣是我自選的外景區，而且我一直好期待係一個FULL OF LOVE AND COLOUR的地方拍婚照，結果拍不出我想要的感覺。有好多景更加浪費了......在藍天無雲的情況下，影馬灣公園和沙灘都應該好靚，但............構圖真的好有問題。我同大王睇完都覺得點解會咁影O既呢....有d景真係無揀到一張相，無謂為景而買相，我只會為想留下回憶而買。同埋有種好強烈的感覺就是攝影師當日好HEA住黎影，好似趕收工咁...

最後來來回回睇左幾次，最終諗住加14張@130(本身package包38張)。

之後就叫返SALES黎同佢傾下啦!呢個SALES我費事開名喇!想知就私人回應啦!宜家簡稱佢叫「黑面神」啦!

佢一黎就問我會唔會加多6張相，咁就可以用$120一張咁買。我地諗都無諗就話唔駛，因為真係揀唔到黎加。之後佢就介紹一下水晶內頁有排版無縫的相簿和我PACKAGE包的相簿的分別。開價七千幾入50張相入水晶相簿。

講真，已經覺得影得唔好，而且好失望，你叫我比加七千幾真係比唔落手。若果影得靚，我地可能已經迷迷糊糊咁落左搭。

之後，我地當然覺得好唔吸引啦!咪同佢講可唔可以比個吸引D O既價錢囉...結果按完計數機一輪又比左第二個價錢出黎，分別係入唔同張數入DESIGN相簿連COATING價錢，好似大約五千蚊入40張入本身PACKAGE包的大相簿有排版連COATING，細相簿都包埋執相。

我問佢可唔可以比個無COATING的價，佢話無...係全包。佢之後又話乜野變色等等之類的說話。我就話至緊要結婚個日無變色就得，我之前買個防潮箱返黎裝就得。

佢話全部包COATING，無一個係無COATING的相簿。即係我得兩條路揀，一係就做DESIGN相簿，一係就唔做。OK....咁即係叫我唔駛入多D相入相簿啦!叫佢平D，大王話若果佢有D誠意，減到去$4,XXX就可能成交喇!但佢死都唔肯減...

佢攪到我好似得兩個OPTION，一係就$5,000成交，一係就買相走。我覺得自己無路可走。

咁我就同佢講，若果PACKAGE包的大相簿入20張，其餘的入哂細相簿，佢又話唔得。我話人地加$300最多可以入33張，佢話唔得，要分開兩本黎計。佢話一本係PACKAGE的細相簿唔包執相，另外的14張要另開一本計。

我話:「唔係嘛!14張又開多本?人地都唔係咁...人地可能最多放33張。」心諗，最多咪加多D錢放埋同一本囉!但佢死都話要分兩本。我覺得無可能一本細相簿得14張咁核突，又整多一本出黎...咁無謂。

佢的SALES技巧真係好令人討厭，佢無比OPTIONS我揀之餘，我問親佢乜都話無，唔可以。試問咁無誠意點傾落去?佢唔係應該問下我想要D乜野去比一D OPTIONS我揀咩?!好似無囉.....成個過程得1同0。

我問親佢乜都話唔得，最後我話:「乜都唔得?咁乜都唔駛攪喇!全部照返PACKAGE包的野啦!油畫都唔轉喇!」(我覺得自己好型呀!)

佢都好型咁話:「好呀!」。咁就結束左這場拉鋸戰......

最終攪左3個半鐘頭先走到...

最後加左$1,820(14*$130)加左14張相走。TOTAL成個PACKAGE就約$7,500拎左52張相走。有20張入大相簿包括執相，另20張細相簿唔包執相，另外有12張散相SOFTCOPY，一油畫和一堆相架包相等等.....

不如來個總結啦!其實由在EXPO JOIN PACKAGE、試衫、化妝和影相的過程中都覺得每一個FB的人都好NICE好HELPFUL，對佢地都有正面的評價。但經過揀相日之後，我覺得影出黎的相未必O岩心水，可能有期望愈大失望愈大啦!

而且，印象最差就是這個SALES.....我環觀周圍的SALES都面帶笑容好NICE。若果轉左SALES，情況已經可能唔同哂......

 

相版之後先再POST啦!