有誠意的冷氣大排檔@妹記大排擋

由於比大王話我成日唔UPDATE BLOG，所以揀今日端午節公眾假期寫下BLOG啦!

講真...我真係有好多野未寫呀!

不如寫下尋晚去左邊度食飯啦!本身想BOOK松屋位於莊士敦廣場的新店，但太遲BOOK喇!於是，突然間想起大王之前去過幾次尖沙咀的妹記大排檔。大王次次都話下次帶我去，所以今晚醒起有呢間鋪就不如去呢度食啦!

這間鋪位於金巴利街金巴利廣場地下。

一入去就FEEL到好涼喇!正...有冷氣的大排檔。

晚上七點幾，所以好快就有位。好多傳統的中式大排檔餸菜，真係花多眼亂，樣樣都想食。

牆上有個黑板寫上招牌菜。嘩...真係乜都想食....

餐前送酒小食-->脆卜卜花生

真係好多野揀....梅菜扣肉煲都只係$42，椒鹽鮮魷都係$48，真係幾平呀!我樓下間大排檔都已經貴過佢多多聲喇!

大王比我話事...咁我就要「黑椒京蔥羊鞍煲」$68

炒過的京蔥好有穫氣，勁香，真係呢碟菜的命脈。羊肉沒有羶味，而且好稔，真的要推介。

豉椒炒聖子$68，平時係出面食都差唔多價錢，所以話呢度O既價錢都好大眾化。

大王叫的例湯--龍利葉粟米煲唐排。飲完好舒服~~

當然少不了這裡的特色，鬼馬油炸鬼。外層是炸上加炸的油炸鬼，入面釀了墨魚膠，再加上甜酸醬，惹味無窮。不過我同大王食左一半已經好飽，最後打包另一半返屋企同屋企人分享。

我地問姐姐拎外賣盒，佢幫我地入盒，仲好專業的將醬汁分開拎，令油炸鬼保持鬆化。果然專業!抵讚!

今次兩個人只試到三個菜，下次要多D人去食多D。我想食椒盬魷魚咀，同埋要用戰鬥碗飲少少啤酒高興下先。

 

地址: 尖沙咀金巴利街45-47號金巴利廣場地下

電話: 2721 2123